တောထဲရောက်နေသည့် ကျောင်းသားခေါင်းဆောင်ရေးသားထားသည့် တော်လှန်ရေးအကြောင်း

“နိုင်ငံရေးသဘောတရားရေးရာ၊ နိုင်ငံရေးဦးဆောင်မှု နဲ့ နိုင်ငံရေးရပ်တည်ချက်မခိုင်မာတဲ့ လက်နက်ကိုင်စုဖွဲ့မှုဟာ အန္တရာယ်များပါတယ်”

တော်လှန်ရေးဆိုတာမှာ လူ‌ဟောင်း၊ စနစ်‌ဟောင်းကို လူသစ်၊ စနစ်သစ်နဲ့ အစားထိုးဖို့ပါပဲ၊ ဒီနေရာမှာ ပဋိပက္ခပြုရခြင်းဟာလည်း တော်လှန်ရေးရဲ့ ရွေးချယ်စရာ အစိတ်အပိုင်းတစ်ခုဖြစ်လာပါတယ်။ ဒါကြောင့်ပဲ လက်နက်ကိုင်တော်လှန်ရေးဆီကို စနစ်ရဲ့ တွန်းပို့မှုကြောင့် ရောက်ခဲ့ကြတယ်။

လက်နက်ကိုင်တော်လှန်ရေးဟာ နိုင်ငံရေးဦးဆောင်မှုရှိဖို့၊ နိုင်ငံရေးသဘောတရားရေးရာနဲ့ စစ်ရေးပေါင်းစပ်နိုင်ဖို့က အရေးကြီးတယ်လို့မြင်ပါတယ်။ နိုင်ငံရေးသဘောတရားရေးရာ၊ နိုင်ငံရေးဦးဆောင်မှု နဲ့ နိုင်ငံရေးရပ်တည်ချက်မခိုင်မာတဲ့ လက်နက်ကိုင်စုဖွဲ့မှုဟာ အန္တရာယ်များပါတယ်။

နိုင်ငံရေးဦးဆောင်မှုမရှိဘဲ တော်လှန်ရေးအလွန်ကာလကိုရောက်လာခဲ့ရင် သိပ်ကြီးမားကျယ်ပြန့်တဲ့ ပြဿနာတွေတက်နိုင်တယ်၊ နိုင်ငံရေးဦးဆောင်မှုမရှိတဲ့ လက်နက်ကိုင်စုဖွဲ့မှုများကနေ စစ်ဘောင်ကျယ်လာမှာပါပဲ၊ စစ်ဘောင်ကျယ်လာတဲ့အခါ နိုင်ငံရေးဘောင်ကျဥ်းသွားမှာပဲ၊ စစ်ဘောင်ကျယ်လာရခြင်းရဲ့ ဆိုးကျိုးတွေကို ကျနော်တို့ လက်ရှိခံစားနေရရုံနဲ့တင် မြင်နိုင်ပါတယ်။

လက်နက်ကိုင်စုဖွဲ့မှုကို နိုင်ငံရေးဦးဆောင်မှု ပြုဖို့အရေးကြီးတဲ့အပြင် လက်နက်ကိုင်တော်လှန်ရေးရဲဘော် တဦးတယောက်ချင်းစီရဲ့ နိုင်ငံရေးအတွေးအခေါ်၊ ရေချိန် ပြည့်ဝနေဖို့ကလည်း အရေးကြီးပါတယ်။ အမိန့်နာခံမှုနဲ့တည်ဆောက်တဲ့ စုဖွဲ့မှုဖြစ်တဲ့အတွက် အဲဒါတွေဟာ အရေးမကြီးပါဘူးဆိုပြီး သဘောထားလို့မရပါဘူး၊

တော်လှန်ရေးဟာ ရေသေမဟုတ်ဘူး၊ ရေရှင်ဖြစ်တယ်၊ လေ့လာရင်းနဲ့ တော်လှန်၊ တော်လှန်ရင်းနဲ့ လေ့လာရတာပါပဲ၊ ဒီနေရာမှာ ခုနက ပြောခဲ့တဲ့အတိုင်း စစ်ပညာတခုတည်းသာမကပဲ တော်လှန်ရေးအတွက် တခြားသော ဖြည့်ဆည်းလေ့လာစရာတွေကအများကြီးပါပဲ။

နောက်တချက်ကတော့ ဖက်ဆစ်စစ်တပ်ကိုတိုက်နေတုန်း ကျနော်တို့တွဲပြီးလုပ်ရမယ့် လုပ်ငန်းစဥ်တွေအများကြီးရှိတယ်၊ ဒီတော်လှန်ရေးရဲ့ စစ်မီးကြောင့်‌ရော၊ ဒီ့ကာလမတိုင်ခင်က ပြည်တွင်းစစ်မီးနဲ့ တရားမမျှတမှုတွေကြောင့်ရော တိုင်းပြည်နေရာအနှံ့က ပြည်သူတွေ ဒုက္ခများစွာခံစားခဲ့ရတယ်၊ ဒီတော်လှန်ရေးတိုက်ပွဲတွေမှာလည်း ကျနော်တို့ဟာ ပြည်သူလူထုကို ကြီးစွာသော ဒုက္ခတွေ မပေးမိလေအောင် ပြုမူကြရလိမ့်မယ်။ ဒါအပြင် သူတို့ခံစားခဲ့ရတဲ့၊ ခံစားနေရတဲ့ စနစ်ရဲ့ ဒုက္ခတွေကြားထဲကနေပြီး ကျနော်တို့ တတ်နိုင်သလောက် ကူညီစောင့်ရှောက်ကြရလိမ့်မယ်၊ ပြန်လည်ထူထောင်ကြရလိမ့်မယ်၊ ကျနော်တို့တတ်တဲ့ပညာတွေနဲ့၊ ကျနော်တို့ရဲ့ ကိုယ်ချင်းစာတရားနဲ့၊ ကျနော်တို့ အတိတ်ကာလတွေက မှားခဲ့ကြတဲ့အမှားတွေကို ဝန်ခံသိမြင်ပြင်ဆင်လိုတဲ့စိတ်နဲ့၊ တကယ့်စိတ်ရင်းနဲ့ ဒါတွေကို လုပ်ရလိမ့်မယ်။ ဒါဟာ တော်လှန်ရေးနဲ့အတူ တွဲပြီးလုပ်ကိုလုပ်ရမယ့် ကိစ္စတွေပါပဲ၊ ဒါဟာ အရင်က လူတိုင်းပြောနေကြတဲ့ လူမျိုးစုအသီးသီးနဲ့ ရင်ကြားစေ့ရေးကို စားပွဲဝိုင်းပေါ်မှာ ဆွေးနွေးလို့ကောင်းရုံ ခေါင်းစဥ်တခုအနေနဲ့ သဘောထားတာမဟုတ်ဘူး၊ တကယ်လက်တွေ့ဆောင်ရွက်ခြင်းသာဖြစ်တယ်။

နိုင်ငံရေးဦးဆောင်မှုရှိတဲ့၊ တဦးချင်းစီကိုယ်ရည်ကိုယ်သွေးပြည့်ဝတဲ့၊ မျက်စီတဆုံးကိုမျှော်ကြည့်ပြီးစုဖွဲ့တဲ့ လက်နက်ကိုင်တော်လှန်ရေး စုဖွဲ့မှုများကို မျှော်ရည်ပါတယ်ခင်ဗျာ…။

မင်းဟန်ထက်
ဒဂုံတက္ကသိုလ်ကျောင်းသားများသမဂ္ဂ
ရန်ကုန်အခြေစိုက်တက္ကသိုလ်ကျောင်းသားသမဂ္ဂများ (တကသများ-ရန်ကုန်)

(ကိုမင်းဟန်ထက်၏ လူမှုကွန်ယက်စာမျက်နှာမှ ကူး‌ယူဖော်ပြသည်။)

Leave a Reply

Your email address will not be published. Required fields are marked *